Málsgögn í opinberum málum

Reglur nr. 462/1994 um málsgögn (ágrip) í opinberum málum.

I.

Þegar ríkissaksóknari hefur fengið í hendur dómsgerðir máls skal hann senda Hæstarétti þær ásamt málsgögnum (ágripi). Um fjölda eintaka málsgagna skal hann hafa samráð við hæstaréttarritara.

II.

Málsgögn skulu geyma endurrit eða ljósrit eftirtalinna gagna í þessari röð, nema sérstakar ástæður mæli með annarri niðurröðun:

1. Ákæra og önnur gögn, sem varða málssóknina sérstaklega.
2. Hinn áfrýjaði dómur ásamt birtingarvottorði og yfirlýsingu dómþola um áfrýjun, ef því er að skipta.
3. Áfrýjunarstefna með áritun um birtingu.
4. Gögn um persónulega hagi sakbornings, svo sem sakavottorð og annað, sem talið er skipta máli við ákvörðun refsingar.
5. Endurrit af þinghöldum málsins.
6. Framlögð gögn í héraði, að því leyti sem ríkissaksóknari og skipaður verjandi telja þau nauðsynleg við flutning og úrlausn málsins í Hæstarétti. Niðurröðun þessara gagna skal, eftir því sem við verður komið, vera í samræmi við framsetningu sakarefnis í ákæru og hinum áfrýjaða dómi.
7. Þegar máli er áfrýjað með takmörkuðum hætti, sbr. a-e liði 147. gr. laga nr. 19/1991, sbr. 7. gr. laga nr. 37/1994, skal takmarka málsgögn með hliðsjón af því, í hvaða skyni áfrýjað er.

III.

Endurrit og ljósrit málsgagna skulu vera skýr og vel læsileg. Þau skulu vera með blaðsíðutali og heft saman. Á kápu komi fram númer og nafn máls, svo og nöfn þeirra, sem flytja málið í Hæstarétti. Efnisyfirlit skulu og fylgja.

Reglur þessar eru settar samkvæmt heimild í 3. mgr. 154. gr. laga nr. 19/1991 um meðferð opinberra mála, sbr. 14. gr. laga nr. 37/1994.

Hæstiréttur Íslands, 13. júlí 1994

---